Ku sa olõt tullu latsõiäst koh mahlakuu alasi laulti"Suur Lenin ta oli üllas, nii armastav hell ja hea, meid lapsi võtaks ta sülle......"(Lulusõna siiäni pään) ja sullõ om pähä tambitu, et latsi sõbral Leninil om 24.04. sünnüpäiv ja sa ei olõ seto ( noil oll veidü tõistõ), sõs om edimält sul Suure Riide säsü mano võtmisega keerulisemb, või aigo minnä vai jääski lihtsälõ vereväs pääväs kallendrin, et saat kotun inämb tüüd tetä, koristada ja kraami.
Muidoki olli latsõiän kah külän munapühä uma kotusõ pääl, saadõti postkaartõ, värvidi munnõ (sibulakuuri ja värviliidsi languga), koksiti ja pühhis suidsutati hääd lihha.Vanaimä istsõ üts kõrv räti alt välän ragisõva raadio iin ja kullõl jumalasõnna Vabast Euruupast vai Ameeriga Helüst.
Ütsaig elli Varstun veidü aigu Volga sakslasõ, mi majan kah ( vanaimä- auma, imä, esä ja 2 last). Mõntvuuri kaimi salahuisi sakslaisi aknõist sisse.Sääl oll alasi ornung, kõrd, sängü pääl hirmudu suurõ ( kats mi patja kimmäle) ja horkvile klopitu sulõpadja, sängümõso piimvalgõ ( Meil joba kirriv sits).Munapühä olli sakslaisil nigu Euruupan, imäpiimäga üten tullu.Ku sakslasõ ENSV-st Saksamaalõ tagasi lätsi, saatsõ nimä ilosid kaartõ ja mõnikõrd oll ümbrikku pantu ka pakikõnõ munavärve. ( Umbõs säändse nigu prõlla egän suurõmban kaubakeskusõn müügil) .Sõs arotati, kuimuudu noide papõrdõga munnõ värvi, fritsu keele ( nii saksa kiilt kutsuti) mõistjaid olõ ess võtta. Aga värvidüs muna saie ja meelen, et olli väiga ilosa.
Nüüdsel aol olõt tettü mutt, ku kotun om võtta sibulakuuri, midä sa olõ ei kõrra perrä viil biojäätmes 👌 viinü ja viisit mässäda ja mäkerdädä , munnõ noidega ilosas värmi🥰
Elo om sinusoidnõ, nigu ütles mu tütär, ku ma küsü, kuis lätt 🤔.
Nelläpäävä helist kontorile üts kundõ kinkalõ mu tüütäja ütel kõvva paar kolm kõrda
"MINA OLENGI INIMENE "!!!!. Ja inemisel saiõ hää miil.
Tundusi nii, et innembä ta peris inemisega kõnõlda es olõ saanu, vast sõs kõnõrobot vai autumaatnõ kõnõlõja nigu nüüdsel aol kõmbõss.
Peris pühä ja ülestulõmine om õks hummõn, täämbä viil vaiknõ puulpäiv.
Nikani hääd inemises olõmist peris inemiisi ja luudusõ kesken
Kommentaare ei ole:
Postita kommentaar