Käve kesknädäli kinun, väiga harva tulõ tuud ette, "Torni " kaeman ". ( Vahtsõnõ dokumentaalfilm). Ütlemädä eloline. Hää pildikiil ja jutus ( narratiiv) ja ku tahat, and ainõst edesi märgotamises.
Elo, tüü ja filmiga köüdüsssen , mõtlõ tihtsäle, miä siin elon ja ilman om inemiisisile tähtsä.
Kogõmus ja elo esi and egä päiv teedä, et võim, varandus ja raha.Rahanälg kaes egält puult vasta.
Latsõ ja latsõlatsõ arvasõ, et nimä PIAT vanõmbitelt midägi saama , aga ei piä jo. Varandus, olku vai väiku, om vannu hindä tüü ja vaiv, esi ehitetü ja kokku kogotu ja näil om õigus tuuga tetä, miä nimä õiges pidävä.
Ku sõs üts saa ja tõõsõ ilma jäässe, om suur tülü majan.
Võimu nimel luulõtadas , no periselt võlsitas , maa ja ilm kokko, Toomas Nipõrnaat ja Kavval-Ants, jääse kavvõdõ maha.
Ilda aigu käve haigõmajan üte provva man ammõtkirjä tegemän. Provva sängün korrut mitmit kõrdi, et ainõlidsel ( materiaalsel) ei olõ määnestki tähtsüst.
Naarsõ tuu pääle ja ütli , et olõ timäga üten nõun, aga ummõti pidi ma ainõlidse peräst timä mano tulõma.
Nigu elon õks, om kõik kõgõga köüdüssen ja egäl vorstil om kats otsa.
Sa võit anda kattita lubaduisi, luutusõn, et ildamba ei olõ noid kinkalgi meelen,
sa võit tülütseda vanõmbite, sõsarite ja velliga, otsi süüdläst kontrahti tegijäst,
sa võit esiki elo hinnaga ütsindä ehitäda korgõ torni ja kaia säält, kas kiäki su poolõ tulõ,
aga miäki ei asõnda ausust, õkva kokkoputmist ja läbikäümist.
Ku om suuv tandsi ( tantsida), tulö tetä edimene samm.Jah , võit " korvi" saia, saatki mõntvuuri, aga piät olõma julgust uuõstõ pruuvi.
Tulõ õigõs võtta, et nüüdsel aol tansidas vai tirgutadas paljo ka ütsindä, aga katõkeistõ om õks hoobis tõistõ.
Pühitsemi pühäpäivä ja umbõ hää ku saat näütüses hindä täüskasunu latsõga periselt kokko puttu ja elo üle märgotada.
Hääga õks.
Kommentaare ei ole:
Postita kommentaar