Iin ollõv raamaduaasta 2025.Raamatist olõ hindäette pikält märgotanu.
Ku käve külast 7 aastaka Antsla muusigakuuli, sõs trehvsi õks mõntvuuri, esiki peris tihtsäle raamatupuuti.Ku sinnä sisse astsõt tilisi ussõ man kellukõnõ, piä kõik oll sääl puust ja õhun esieräline raamatite hõng. (Ku seod kirota, tulõ hõng miilde ja nõnna). Külän raamatit es müüä, raamadupoodist sai õks ütte tõist ostõtus.Raamadu massi sõs kopkit, ruublinõ oll kallis jo.
Piaaigu kõigil olli kotun raamatit täüs raamaduriiuli, kon ütstõõsõga kõrvusi " kogutud teosed". Halli paprõga Varamu, mustaga Tammsaarõ, sinitsega Hint, päält tuu Mirabilia ja kõkõ muud. Ku pallo noid periselt loeti ja ku pallo ostõti tuuperäst, et kõik ostsõva midä saia oll, tiiä ei.
ENE ja ENEKE'se saamises tull küläst varra liina sõita, saista hummogu järjekõrran ja ku vedäsi sait telli.Mu vanõmba jäivä ilma.
Ülikooli aigu saisõmi Raatusõ platsi raamadupoodi ussõ takan, oll teedä, kuna vahtsõ tulõva ja ostsõmi stipi iist ütte tõist.Mul tuust aost viil mitmit alalõ.
Raamadupoodi om nüüdki õnnõ suurõn liinan, veidü ütte tõist müüvväs söögiga ütest poodist. Põlva raamadupuut, kah puust, panti kinni jo üle 10 aasta tagasi.
Üts sõbõr andsõ fb-n teedä , et mi väikun riigin andas aastan vällä 2000 vahtsõt raamatut ( esi ei tiiä, kas nii ka um).
Taivaskoast andsõ inemine jälki teedä, et leüti suur kastitäüs raamatit, tõisi siän ollõv ollu harvusi ( haruldasi).
Suvõ poolõ valut tõõnõ sõbõr süänt, et raamadukogudõn kandas maaha paljo väärtkirändüst, midä ei olõ viimätse viie aasta joosul loetu.
Ütelt puult saa timä murrõst arvo, aga ku pallo om noid kiä vanna tahtva, õks uut ja menukit. Raamadukogu olõ ei kummist, taht kütmist ja kõrran pidämist.
Ku ma esi nüüd raamadupuuti trehvä, olõ nõvvolda.
Riiuli ja leti umma raamatit veerest veereni täüs, kaet, võtat peiu, sõrmitsõt ja inämb jaolt panõt sinnä tagasi kost võtit.
Päält tuu om unikite viisi allahinnatuid, noidki paistus ei haara kiäki.
Viimäte kaiõ mullõ polka ( kaiõ perrä, täütsä võrokiilne sõna) päält vasta kats kuningimändät-Elizabeth ja Silvia.
Ilosa naasõ mõlõmba, aga must jäivä nimä riiuli päält kundõsit kaema.
Ei tiiä, kas egä raamat lugõ, aga mõni kimmäle.
Nii pikk raamadusõbra tervütüs,
hääga ja väega
lugõmise ja kirotamiseni ( salakeelen)
