Jasmiinine õhk
joo, hinga ja lenda, see
uus õhujooga
Kaara-Jaaniga kergodi
keväjast suvvõ.
Hain visanu rinnuni,
murotraktori, trimmõri
jõõratasõ varra hummogust
pümmeni.
Lumbikunna kärisese:
võehh-võehh,
võehh-võehh,
kurrrat, kurrrat,
kurrrat, kurrrat!
Kanaperse häiermist
palmidsõ vanigu päähä,
Kaara-Jaani vungiga
jaani lähä.
meri
kohisõs tarrõ
päiv
küdsä liiva
piimvalgõ
pilvetombu
ripnõsõ
ilma pääl
tsirgukuur
tsiristäs pääva
mõnõs
lühküs tunnis tudilõ
meri
kohisõs tarrõ
rohiltsõ
kunna lumbin
üles
astva kärre helügä
kõvva
laulva ja mõnoga
meri
kohisõs tarrõ
otsit
mu kätt sa(q)
täüskuu
ei lasõ maadaq
meri
kohisõs tarrõ
Maalõ, küllä,
katõlpuul tiiperve tsirelipuhmi
takah elämise.
Maalõ, küllä,
tühi vallamaja, järv, koolitarõ.
Maalõ, küllä,
bussijaam, Coobi puut,
kohkile maailmaparandaja
ratta naal kapõrdasõ.
Maalõ, küllä,
läbi sõit puultühi liinibuss,
ütsik põkats,
esiolõja kassi hulkva edesi-tagasi.
Maalõ, külla,
sainast vällän kõik juhtmõ,
aida iin istu,
võiulilli valgõ undsõ
laugõlõs muro pääl.
Makus, makus om elo
siin ilma pääl!